ТОЙ
Қарақалпақша
ат. Турмыстағы қўанышты жағдайларға өткизилетин салтанатты жиын, мереке.
Тойға барсаң бурын бар, бурын барсаң орын бар (ққ.х.н.).
Айт атлыныңки, той тонлыныңки (ққ.х.н.).
Биздиң бир жақын ағайинимиз той берип атыр, сени соған шақырып келдим (К.Султанов).
0 Той тойлаў — тойға қатынасыў, барыў.
Халқы менен, Гүләйым үлкен тойды тойлады («Қырқ қыз»).
Жаслық той — жаслардың турмысындағы қўанышты мереке.
Келиң, жаслар фестивальға.
Келиң, жаслық тойына (И.Юсупов).
Той баслаў — узатылған қыздың тойында айтылатын қәдели қосық.
Отырыспалардың бастаныўы «Той баслар» болады (Ә.Тәжимуратов).
Той-мереке — салтанатты жиын, отырыспа.
Той-мереке менен садақа, жиын бир-бириниң қатынасығысыз өтпейди (Т.Қайыпбергенов).
Той-тамаша бериў — салтанатты мереке, ойын-күлки.
Үш ағайынды жигит елине барып, той-тамаша берип, мақсат-мурадына жетеди (ққ.х.е.).
Той-тамаша болыў — салтанатты жиынның болыўы.
Мерген алтын қабақ атты, Той-тамаша болған екен (Бердақ).