BATÍRÍW
Qaraqalpaqsha
f. 1. Bir zattı jerge kirgiziw, siniriw, sindiriw.
... ushı shıǵarılǵan qazıqtı jerge batırdı da tóbesinen balta menen urdı (Ó.Ayjanov).
2. Suw yamasa suyıq zatqa bir nárseni malıw, suǵıw, salıw, basıw.
Qabaqtı suwǵa batırıp otırsa da, eki kózi dáryanıń árine tigiledi (K.Sultanov).
...tumsıqların suwǵa batırıp, kúndi shokıǵańday boldı (A.Begimov).
0 Kúlkige batırıw — kewlin kóteriw, kewilleniw, waqtı xoshlıq etiw, shadlanıw.
Oyın? ... haha-xa-xa!... way, Arıwxan-ay kúlkige batırıp tasladıń aw, pay! Anań paqır seni kóp erkeletti (I.YUsupov).
Qarızǵa batırıw — basqa adamnan aqshalay yamasa zatlay hár túrli nárselerdi kóp alıw, kóp beriw.
Orıs bayları Túrkstan diyqanlarına paxta egiw ushın ádepten pul berip, erksiz qarızǵa batırıp turǵan (Q.Irmanov).
Oyǵa batırıw — bir nársege oylandırıw, oylanıw.
Bunday awır «oyınǵa» tosınnan aralaskan balanıń júregi shorshınıp, álle qanday bir ayanısh sezimi kewilin qobaljıttı hám oyǵa batırdı, ... (K.Sultanov).
Qarasın batırıw — kórinbey ketiw, joq bolıw, basqa jaqqa jiberiw.
Qolayın tapsa, Qılıshbaydıń da qarasın batırıw (Q.Aralbaev).
Sózdi batırıw — qattı sóylew, kewline tiyiw, qapa qılıw, keyiw.
SHamurat Grigoriyge sózdi batırıp-batırıp ayttı (Q.Dosanov).
Kúndi, aydı, juldızdı batırıw — kúnniń túnge aylanıwı, túnniń kúndizge ashanıwı, uzaq kútip otırıw, kúndi ya túndi kútiw.
Usı awılda tań atarda gúl jarıp, batırǵanman talay úrker, sholpandı (K.Sultanov).
Tırnaǵın batırıw — zorlıq etiw, ústemlik etiw.
Dushpan tırnaǵın qattı batırdı, ... (Á.SHamuratov).
Tumsıǵın batırıw — jawdıń kiriwi, qarsı keliwi.
Watanımızdıń jan-táni mánen jawlardan saklaǵısı, tumsıǵın batırayın degen dushpandı ayamasa ol sózsiz quwanadı dep oylayman (Á.SHamuratov).
Ráhátke batırıw — janı jay tabıw, ráhátleniw, házleniw.
Terek astında dem alıp, biraz ráhátke batıp qaldım, ... (Q.Ayımbetov).
Janına batırıw — janına tiygiziw, julınına tiyiw, shorshındırıw.
Kempir janına batırıp bir gáp ayttı olarǵa (qq.x.e.).
Tereń batırıw — qattı tiyiw, batıw.
... «kóp qorqıtar, tereń batırar» degen kóptiń aydınına bata almay,... («Máspatsha»).