BILEK I
Qaraqalpaqsha
at. 1. Adamdardıń shıǵanaǵı menen qoldıń qosarınıń bilezikliktiń basına shekemgi múshesi, aralıǵı.
Jasawıl qara balanıń bileginen shırp etip weladı (K.Sultanov).
Bilekte bilezik, barmaqta júzik, Onıń barmakdarı gúmis yańlıdı (qq.x.q.).
2. awıs. Kúsh, miynet, jumıs.
Bilegi juwan birdi jıǵadı, Bilimi bar mıńdı jıǵadı (qq.x.n.).
Júrekte jaslıq jigeri, Bilekte tasqın quwat bar (B.Qayıpnazarov).
Áne bilek, áne kúsh, Áne ǵayrat, áne is, Gáhi qalada, gá dalada, Saldı mártler bir urıs («Qoblan»).
0 Aq bilek — sulıw, formalı bilek.
Aq bilegiń bolmasa, Altı jerden qas qoyıp, Bilezik salmaq ne payda (qq.x.q).
Dúrs-dúrs etip barıp júrek basıldı, Aq bilekler moynına da asıldı (I.YUsupov).
Názik bilek — jińishke, ázzi, qılday.
Názik eken onıń bilegi, ... (gazetadan).
Jińishke bilek — kishkene, názik, qılday.
Julqınsa da Serjannıń jińishke bilegin námnaǵan qol qıymıldatpadı (T.Qayıpbergenov).
Talmas bilek — kúshli, qarıwlı.
Kaytpas júrek, talmas bilek.
Qol uslasıp bassań keter (Q.Irmanov).
Som bilek — bilegi etli, qarıwlı bilek.
Saqal-murtı shıqpaǵan, sulıwshıq, boyshań, som bilek (B.Qayıpnazarov).
Arıstay bilek — uzın, úlken.
Formaları ılashıqtay, Bilekleri arıstay, Murınları qarıstay, Baltırları talıstay («Alpamıs»).
Jumırı bilek — bulshıq etli, duǵıjım, juwan, qarıwlı, kúshli.
Jumırı bileginen taralǵan tamırları ádewir-aq bilinip turadı (J.Aymurzaev).