BOSATÍQ
Qaraqalpaqsha
f. 1. Qutqarıw, shıǵarıw, erk beriw, erkinlikke ie qılıw, azat etiw.
Jálladlar Ayparshanıń qol-ayaǵın bosatıp, tóbeden túsirdi («Máspatsha»).
...posttı joldasına tapsıra salıp, tutqındı bosatadı (G.Esemuratov).
Bosattı patsha torınan, Óz maqseti pitkennen soń (Berdaq).
2. Alıp taslaw, shıǵarıw.
Táńirbergenovtı oqıtıwshılıq jumısınan bosatıw tuwralı hár sapar jańa oqıw jılınıń basında bir talay daw-jánjeller bolıp, basılıp júrdi (Q.Ayımbetov).
Birazlar ornınan bosatıw kerek dep tiyisli jerlerge másele kóterdi (Ó.Ayjanov).
3. Keńeytiw, jazdırıw.
...men ózimniń awhalıma, qara basımnıń jaǵdayına qarap buwılǵan beldi bosatıwǵa tiyisli emespen (Q.Irmanov).
4. Jumsartıw.
Oǵan jerlerdi bosatıw hám júwerilerdi dombıqlaw jumısların tapsırdı ...(S.Ayniy).
5. Orın tayarlaw, sazlaw.
Bosattı jaydan bir orın, Anası járdem etti de (J.Seytnazarov).
6. Ídıstıń ishindegi zattı basqa bir ıdısqa salıp bosatıw, ishinde hesh nárse qaldırmaw, bos etiw.
Ol dáudiń barlıq awqatların da jerge jaylastırıp, tabakdarın bosatıp beredi (qq.x.e.).
Qorjınıńdı, ózimizge ber, bosatıp beremiz (T.Qayıpbergenov).
7. awıs. a) Azat etiw, shıǵıp ketiw.
Mádemin kelip, ornına ie boldı, Túrkmenxanları Xiywanı bosattı (Q.Irmanov).
b) Belgili bir orında hesh nárse qaldırmay bárin basqa jaqqa shıǵarıw.
...kelgen jawshılar qalada hesh nárse qaldırmay sırtqa quwıp, qalanı bosattı (qq.x.e.).
May jaǵıp bosatıw — bılqıldatıw, jibitiw, jumsartıw, jibistiriw.
Egerde jaraları bolsa may jaǵıp bosatıp alayıq, awırıp janındı qıynap júrer (J.Aymurzaev).