BUZÍLÍW
Qaraqalpaqsha
f. 1. Kulaw, qıyraw, sınıw.
... buzılǵan, sınǵan múlkińizge bir-eki gúwalardıń qatnası menen akt dúzip bizge ákeliń! — dep kapitan trubkanı qoydı da kabinetten shıqtı (A.Bekimbetov).
...traktordan basqa awıl xojalıq mashinalarınıń buzılǵan jerlerin dúzete alatuǵın temirshi balanı kórsetedi (G.Esemuratov).
2. Búliniw, wayran bolıw.
Ustalı el dúzeler, Qassaplı el buzılar (qq.x.e.).
SHańaraǵım buzıldı, tarap ketti (A.Bekimbetov).
3. Ózgeriw, aynıw.
Tún ortasında túnniń rayı qápelimde buzıldı (K.Sultanov).
Nardek bolıp sóz bildińiz, Qızıl kórip buzıldıńız (Átesh).
0 Buzılıp-dúzeliw — bir nórseniń buzılıwı hám onlanıwı, jaqsarıwı, sazlanıwı.
Urıs waqtında bul kempirdiń ústi duman, qara túgin, kúnde buzılıp-duzelip turatuǵın edi (Q.Ayımbetov).
Kewil buzılıw — ózgeriw, aynıw, jibisiw, juwasıw, ıdıraw, jılamsıraw, ózin uslap tura almaw.
Ata dediń pútkil kewlim buzıldı, Kábap boldı, jandı bawırım ezildi(«Máspatsha»).
...góne patlaqtı, góne dártti aytıp ókpelesip, qayaqgaǵılar oyǵa túsip kewli buzılıp jılap otırǵanlar da tabıladı (Q.Ayımbetov).
Turmıstan buzılıw — adamgershilikten, bala-shaǵadan, shańaraqtan ayırılıw.
Orazbay Nurbaevtıń turmıstan buzılıp, óz hayalın quwıp jibergeni tuwralı tekseriw juwmaǵın xabarladı (A.Bekimbetov).
Uyası buzılıw - ordası wayran bolıw.
Hárreler ushıwban párwana bolur, Uyası buzılıp paldan ayrılsa (Ájiniyaz).
Toparı buzılıw — taralıw, daǵıw, daǵısıw, tarap ketiw.
Atlılar tobı buzılıp, tolqınlasıwǵa qaradı (T.Qayıpbergenov).
Túsi buzılıw - ózgeriw, kubılıw, aynıw.
Túsiniń buzılǵanın kórip, Ótemurat onnan sayın shanshıwına tiydi (K.Sultanov).
Kúnniń, hawanıń buzılıwı — bult basıp hawanın ózgeriwi, dawıl bolıwı, jawın jawıwı.
Birazdan keyin kún buzılıp jawın da jawdı (A.Bekimbetov).
Azıq-awqattıń buzılıwı — Azıq-awqattıń iyislenip, jewge jaramsız awhalǵa keliwi.... qutınıń ishindegi qaldıq et penen balıqtıń iyisinen úydiń hawası buzılıp ta ketti (Q.Ayımbetov).