BÓLENIW
Qaraqalpaqsha
f. 1. Qoplanıw, sallanıw, dolanıw, sazlanıw.
Qır dógerek kóklep, aǵashlar jasıl lipasqa bólendi (A.Bekimbetov).
Qız shayı-jipek lipasqa bólenip, qasına qoyılǵay appaq párdastıqqa bas qoydı (T.Qayıpbergenov).
2. SHadlanıw, yoshlanıw.
Xoshamet sózlerge bólengen doslardıń ortasında Ǵániy jımıyıp kúlip otırdı (K.Sultanov).
0 Quwanıshqa bóleniw — kúlip oynaw, shadlanıw.
Sultan menen Jiyemurat búgin júdá áhmiyetli úlken ispitkergen adamday sheksiz quwanıshqa bólenip ketti (A.Bekimbetov).
Kókke bóleniw — kók ósimliklerge, tereklerdiń kógeriwi, ósimliklerdiń kóklewi, sán beriwi.
Kókke bólengen bul ullı qala shınında da, qonaqqa júdá shıraylı kórindi (A.Bekimbetov).
Sánge bóleniw — kórkem bolıw.
...úy ishin álle qanday sánge bólengendey azada kórindi (Ó.Xojaniyazov).
Ráhátke bóleniw — házleniw, ráhátleniw.
- Qánekey, usınday samal mudamı esip tursa! — dedim men ráhátke bólenip (Ó.Xojaniyazov).
Danqqa bóleniw — ataqqa, húrmetke iye bolıw.
Miynet islep dańqqa bólense de, oqıwǵa barsa da bir jaǵında Oral júr (M.Abdraymov).
Húrmetke bóleniw — izzetke iye bolıw.
Bólengen sheksiz húrmetke, Kórmekshi bolar baslıqgı (B.Qayıpnazarov).
Tınıshlıqqa bóleniw — urıssız otırıw, urıssız, jánjelsiz otırıw, paraxatshılıqta jasaw, turıw, Jaydıń ishi tınıshlıqqa bólengen (Ó.Ayjanov).
Ǵamxorshılıqqa bóleniw - qayırqomshılıqqa, izzetke, húrmetke iye bolıw.
Xalıqtıń ǵamxorshılıǵına bólengen jırawlardıń miynetleri joqarı bahalandı (N.Dáwqaraev).
Gúllerge bóleniw — gúllerdiń sán beriwi, gózzal túr beriwi.
Kózime gúl-gúl dóngen keń dala, Gúllerge bólengen awıl hám qala (T.Seytmamutov).
Altınǵa bóleniw — awıs, molayıw, sánleniw, oralıw.
Biyik jaylar boyın sozıp aspanǵa, Altınǵa bólengen maydan dalań bar (D.Qasımov).
Saltanatqa bóleniw — hár túrli sánge, saz-sáubetke iye bolıw.
Keshe óz saltanatına bólenip, dónip tur (I.Qurbanbaev).
Kún nurına bóleniw — kúnnen ráhátleniw, házleniw (ház etiw).
Baǵ toǵaylar kún nurına bólenip, Janǵırtıp sayradı qusı-búlbili (J.Aymurzaev).