GEZEK
Qaraqalpaqsha
at. 1. Izbe-izlikte dúzilgen bir nárseniń tártibi, reti, náwbeti.
Qonıwdıń reti kelip qalǵan jaǵdayda gezek penen uyqılaydı (T.Qayıpbergenov).
Gezek penen suw ishpekte diyqanlar, qalmaptı hesh suwǵa talas, qıyqańlar (Aqsholpan Amaniyaz).
2. Bir nárseni alıw ushın, bir jerge kiriw ushın, tártip penen turǵan adamlar dizbegi.
Sol dúzilgen tártiptegi birewdin ornı.
Balıqshılar tapsırǵan balıǵınıń kvitantsiyasın alıw ushın gezek tutıstı (K.Sultanov).
«Gezek pada» menen baǵıp júr malın, Malǵa pidá etip, bir shıbın janın, SHınında da, ayap kettim joramnıń, Adam shıdamastay gedeylik halın (I.YUsupov).
3. Payıtı keliwi, waqtı bolıw.
Hámmesi de gezek kúter búginshe, Erteń qıs kiyatır qılıshın súyrep (K.Raxmanov).
4. Jumıs waqtının almasıp keliw tártibi.
5. Birinen keyin biri, alma-gezek.
Iship alǵan soń tiyispes gezek, Ushlastırmas birin-birine hasla (K.Raxmanov).
0 Birinshi gezekte — eń áweli, aldı menen, eń birinshi.
Gezegi keliw (kelgende) — waqtı keldi, sáti tústi, payıtı kelgende, waqtında.
Bilmedim, ol qansha sóyledi tınbay, Gezek kelip qalalar maqtawǵa.. (K.Raxmanov).
Gezegin alıw — náwbetin aldı.
Gezek beriw — jol beriw.
Gezek bermew — jol bermew, sóz bermew.
Gezekten tıs — belgilengen jobadan tıs, aldın ala jobalastırılǵan.
Óz gezeǵinde — náwbetinde.