ETEK

Qaraqalpaqsha

at. 1. Kiyimniń tómengi jaǵı, shalǵayı. Házir dep etegine asılıp dástúrxan jaydı (K.Sultanov). Men onıń súti jerge tógilmesin dep etegimdi tuttım (S.Ayniy). Kempir etegine quyılıp aqqan kóz jasın jeńi menen súrtti (K.Sultanov). 2. Tawdıń xám taǵı basqa nárselerdiń tómengi jaǵı, jiyeǵi. Neǵe ekeni belgisiz, búgin ol kóldiń etegine kóbirek qaraydı (Ó.Ayjanov). Tawdıń eteginde, úsh qaraqshı bar (qq.x.e.). Awlaq jerde alańnıń eteginde, Erkin oynap eki jas mawqın bastı (J.Aymurzaev). 3. awıs. Belden tómengi jaq, áweret. Bul dúnyaǵa shıqqalı, Esimdi bilip ińǵálap, Etegimdi japqalı, Qayǵınıń suwı qandırdı (Jiyen jıraw), Etegi keliw — med. Hayal-qızlarǵa tán jagday, olardıń erjetkenlik belgisi, tuqım qaldırıw múmkinshiliǵi, jınıs bezleriniń oyana baslawı. Etegine salıw — bala tuwmaǵan hayalǵa keleshekte perzentli bolar degen ırım qılıp erli-zayıplılarǵa jaqın aǵayinleriniń óz perzentin beriwi, inam etiwi. Jamaldı jasında Tilewmurattıń xayalınıń etegine salǵan eken (qq. kem. atl.).