KETIW
Qaraqalpaqsha
f. 1. Bir jerden ekinshi bir jerge jol alıw, qozǵalıw, jónew.
Endi kemeshilerdiń tez ketiwge tayarlıq kórip atırǵanı málim boldı (B.Bekniyazova).
... qalanı taslap batır túrkmenler ketti (Q.Irmanov).
2. awıs. Óliw, qaytıs bolıw, dúnyadan qaytıw.
Ol bolsa burınǵı óziniń ókpe awırıwınan ketti, — dedi kelinshek (Q.Ayımbetov).
0 Jadıray ketiw — kewilli bolıw, kewilleniw.
— Qáynim! — hayal shırpını qaǵıp jiberdi de, burınǵısınday bolmay jadıray ketti (T.Qayıpbergenov).
Ídırap ketiw — buzılıw, eriw, iriw, ıljıraw.... muz ıdırap ketiwge qaradı (A.Begimov).
Qıtıqlap ketiw — jıbırlatıw, qıymıldatıw.
Dáryanıń espe tolqınların qıtıqlap ketkendey boladı (K.Sultanov).
Ashıwı qaynap ketiw — qáhári keliw, qızıw, jıǵırdanı qaynaw.
Al, kókiregine dıq túsken ananıń júreǵinde dushpanǵa qarsı ashıw qaynap ketti (T.Qayıpbergenov).
Haplıǵıp ketiw — hawlıǵıw, qoppıǵıw, isiniw.
Birden oyanıp, jas bala nárse, meni kórerde qaplıǵıp keter (T.Qayıpbergenov).
Tońıp ketiw — dirildew, zirildew, qaltıraw.
Al, ot jaǵıw jaǵına kelsek, tońıp kettik (T.Qayıpbergenov).
Óz basına ketiw — ózinshe háreket etiw, ılaǵıw.
Ol bazda jaqsı-jamandı onsha ańdamay óz basına ketip qaladı (J.Aymurzaev).
Kúnniń túnerip ketiwi — bultlasıw, dumanlasıw.
Túnerip ketti kún astı, Xdwanı kem-kem bult bastı (T.Jumamuratov).
Hawanıń buzılıp ketiwi — buzılıw, ózgeriw, aynıw.
... qutınıń ishindegi qaldıq et penen balıqtıń iyisinen úydiń hawası buzılıp ta ketti (Q.Ayımbetov).
Qashıp ketiw — a) qızdıń turmısqa shıǵıwı.
... qızı qashıp ketken (K.Sultanov), b) jasırınıw, kórinbew.
Eń keyninde qarızıńızdı tólemey qashıp kettiń (Q.Irmanov).
Aldan ketiw — pántlew, baplaw.
... qızdı aldap ketpekshi boladı (qq.x.e.).
Zárresi ushıp ketiw — shorshınıw, qorqıw, janı qalmaw, hawlıǵıw.
Biziń qámmemizdiń zárremiz ushıp ketti (T.Qayıpbergenov).
Oyǵa júzip ketiw — oylanıw, qıyal qılıw, oyǵa shúmiw.
Sen nege sam-saz bolsh qaldıń, qanday oyǵa júzip kettiń, — dedi Sáwle qolın-qolınan jazdırmay turıp (S.Xojaniyazov).
Íqlası ketiw — qıyallanıw, kumarlanıw, zeyinleniw.
Óytkeni, geyde ıqlasım ketetuǵın edi (Ó.Ayjanov).
Qızarıp ketiw — qızıl túske eniw.
Uyalǵanınan júzi shala pisken pomidorday qızarıp ketti (Ó.Xojanov).
Suwǵa shúmip ketiw — batıw, kiriw.
Hátteki, degdiniń kurǵaq tayaqdarı da suwǵa shúmip ketken (A.Bekimbetov).
Qulpırıp ketiw — dolanıw, túrleniw, gúlleniw.
Qızlardıń júzleri baǵdaǵı ósip turǵan gúllerdey qulpırıp ketti (Ó.Xojaniyazov).
Adastırıp ketiw — aljastırıw, ǵabırıstırıw, shatastırıw.... Atajannıń balası Sadullanı uzaq jerde bile-góre adastırıp ketipti, ... (A.Bekimbetov).
Jantaylasa ketiw — qaptallasıw, qosarlasıw, qarsılasıw.
Ol da ózindey baladan taysalasıp qalsın ba, jantaylasa ketti (T.Qayıpbergenov).