KURS I
Qaraqalpaqsha
at. 1. Belgili bir mamanlıqqa tayarlaw ushın shólkemlestirilgen qısqa múddetli oqıw túri.
On altı jasımda úsh aylıq kurstı pitkerdim de, rulge otırdım (M.Nızanov).
Ziybagúldi úsh aylıq kursqa shaqırıp edi (Ó.Ayjanov).
2. Joqarı hám arnawlı orta oqıw orınlarınıń xár bir jılı, bir jıllıq basqıshı.
Ol birinshi kurs ushın sońǵı ekzamen tapsırıp shıǵadı (T.Kayıpbergenov).
3. Emlew júrgiziwdin tolıq mólsheri, bir waqıtta emleniw dáwiri.
4. Oqıw orınlarında qanday da bir ilim yamasa onıń ayırım bólegin belgili kólemdegi sistemalı bayanlama, yaǵni usınday bayanlamadan ibarat bolǵan sabaqlıq.
«Házirgi qaraqalpaq tili» kursı.