KÁBAP
Qaraqalpaqsha
at. 1. Góshti maydalap temir iske dizip, qozdıń ústine pisirilgen awqat, taǵam, shashlık.
Atına takqanıń tillá sádepti, Xızmetińe tánde janım kábaptı (N.Dáwqaraev).
Balıq kuwırtıp jedi, sırttan kábap aldırdı, biraq bárin de Aqshagúl badastúrlep, aldına qoyıp júrdi (M.Nızanov).
2. SHoktıń háwirine pisirilgen gósh.
Tas tandırǵa jeti qoydıń góshin kábap pisirip, eshegine artıp zindanǵa kelip, atıp turdı («Alpamıs»).
Kiyiktiń etin parshalap, Jaqsılap kábap etedi («Qırq qız»).
Jolda atıp alǵan kiyigin kábap islep jep otırǵanda, bayaǵı eki qız taǵı kelip úydiń bir qaptalında otıradı (qq.x.e.).
3. awıs. Adamnıń ishki dúnyası, qayǵı-uwayımları, jábir-japaları.
At moynına taqtım tilládan sádep, Barshın ushın júrek-bawırım kábap («Alpamıs»).
Atqa taqtı sádepti, Júrek-bawırım kábaptı («Máspatsha»).
Seniń ushın tánde janım kábaptı, Asıqpayın kóp eteyin tawaptı («Qırq qız»).
0 Kábap bolıw — qayǵı shegiw, janıp kúyiw, uwayım shegiw, kapa bolıw, kayǵıǵa ushıraw.
Kúyip bawırım kábap boldı, Táǵdir solay jazǵan eken (Berdaq).
Tandır kábap — tandırǵa jawıp pisirilgen gósh.