PÁTIYA
Qaraqalpaqsha
at. 1. din.s. Qoldı jayıp quda jolına, ólgen adamlar ushın yaki awqat jegennen keyin aytılatuǵın tilek.
Jaslıǵımda qaysınday ǵarrınıń xızmetin etsem de báriniń pátiyası birew edi: «Ómirińniń nurı sónbesin» deytuǵın edi (T.Qayıpbergenov).
Men amanlıq-esenlik ushın pátiyaǵa qol jaydım (M.Nızanov).
Dasturxanǵa pátiya oqılıp atırǵanda: — Hámdam, hámdam — degen dawıs esitildi (S.Ayniy).
2. Tilek, alǵıs.
Tap ózim olardıń basların qosıwǵa xaq niyetim menen pátiya berip, aldı menen alǵısın alaman, - dedi Káramatdiin (J.Aymurzaev).
Gápine doslar oylanıp, Pátiya berdi, jıynalıp (T.Jumamuratov).
Ash arıǵın toydırıp, el quwantıp pátiya aldı («Máspatsha»).
0 Pátiya oqısıw — qız-jigitti bir-birine qosıwǵa kelisiw, uáde berisip shártlesiw, kelisimge keliw.
Kisige pátiya oqısıp, mal ótkerisip qoyǵan qızımdı birew áketip qalıptı, — dedi jón-josaq ta soraspay (T.Qayıpbergenov).