SARǴAYÍW
Qaraqalpaqsha
f. 1. Sarı túske eniw, túsi ózgeriw.
— Ájep, ata! — bala ornınan turıp qamıs qálemshe menen aǵashtan oyılǵan dáwetin hám sarǵayıp gónergen bir japıraq qaǵazın alıp, saqka júginip otırdı (K.Sultanov).
Qaydan bilsin, kúnde sarǵayǵan qawınların iyt jey bergen soń qolına shanıshqı alıp andıǵan ǵoy! (T.Qayıpbergenov).
Japıraqlar sarǵayıp, qaraqalpaq dalalarına gúz keldi (K.Kárimov).
2. Azıw, boldırıw, júdew.
Jas kelinniń bes-altı ay xat keshikkenine balıqgay tuwlap, zapıranday sarǵayıp júrgenin sezip, beline mádet bolar ma dep aytqan sózi edi (K.Sultanov).
Sarı gúl deǵeniń zapıran túsli, Hesh kimge bermeyin, ózimde qalsın, Qulpırıp sarǵayǵan qumlardıń ústi, Dos kúlip, dushpanıń sarǵayıp talsın (I.YUsupov).
3. awıs. Kútúwge shıdaw, sabır etiw.
Sabır túbi sarı altın, sarǵayǵan jeter muratka (qq.x.n.).
Men qızımdı «pálen jılı» urıs pitedi dep «qabasan»nıń esiginde sarǵaytıp otırmayman (K.Sultanov).
Kók aspanǵa qarap kewlim súyindi, Jazdıń lipası der jasıl kiyimdi, Saǵınıp, sarǵayıw xosh eter kimdi? Zapıran jamalı gúzge jarasar (I.YUsupov).
— Biziń jolımız asıwları kóp jol, nabada, túzden keshiksek, bular sarǵayıp otıra bermesin, — dedi orıs sawdageri (T.Qayıpbergenov).