TAŃ I
Qaraqalpaqsha
at. Kún shıǵar aldındaǵı mezgil, waqıt.
Súmbile tuwsa suw suwıydı, Tárezi tuwsa tań suwıydı (qq.x.n).
Hár bir atqan jańa tańnan ómirge jaqgılıq kútip, hár kúngi tań quyashına jaqsı úmit artatuǵın xalıqtı, báqárdiń dáslepki belgileri-aq sheksiz kuwandırdı (T.Qayıpbergenov).
Usılardı uwayımlaw menen tańdı derlik uyqısız atqardım (M.Nızanov).
0 Tań atıw — a) túnniń pitiwi, kúnniń shıǵa baslawı.
SHólden jáne tili awzına sıymay, bir seksewildiń astın qolı menen tırnap, ızǵarǵa bawırın basıp jatıp, neshe kún uyqılaǵanı biymálim, oyansa, tań atıp, qaptalındaǵı joldan onlaǵan eshekke júk artıp baratırǵan duzshılardı kórdi de, izlerinen baqırıp juwırdı (T.Qayıpbergenov).
Aqbiydaydıń kelgeninen pútkil awıl xabarlanıp, tań atıw menen awıl arasındaǵı diyqanlardıń shadlı qosıǵı jańladı (T.Qayıpbergenov).
Bir uyqılasa tań atadı, meniń on-on bes dollarım hesh kimniń ishine teppes (M.Nızanov).
b) qıyınshılıqtan qutılıw, talabı kelisiw.
Bizin de tańımız atıp qolımızǵa qus qonar dep táselle berdi (T.Qayıpbergenov).
Tań atırmaw — qıynaw, azaplaw.
Tań saz beriw — tań ata baslaw.
Tań qarańǵısı, tań sáqár — tań atıwǵa beyimlengen waqıt.
Tań asıw — emleniw maqseti menen piyadalap uzaq jol júrip kelip, as-suw ishpey tún boyı jatıp uyıklaw, tınıǵıw.
Tań namaz — tań atqannan kuyash shıqqanǵa deyin oqılatuǵın tańǵı namaz.
Ádewirden soń, tań namazınıń azanın esitip, shapshıp túrgeldi (T.Qayıpbergenov).