ÍLAQ
Qaraqalpaqsha
at. Eshkiniń bir jasqa tolmaǵan tóli, balası.
Bir kúni úyine kelse, baylanǵan kók ılaqtıń birewi ólipti (A.Dabılov).
Atı ılaq demeseń, serke bolıp tur (K.Sultanov).
0 Ílaq oyın — at ústinde júrip bawızlanǵan kishkene ılaqtı tartıp oynaytuǵın xalıqtıń milliy oyınınıń túri.
Qırıq qızı menen otawda, Tartıp ılaq oynaydı («Qırıq qız»).
Ayparsha keselinen ayıǵıp, maydanǵa shıǵıp tursa, qalmaqtıń jas jigitleri shoq-shoq, top-top ılaq oynap júrgenin kórdi («Máspatsha»).
Ílaq shabısıw, ılaq shabıw — ılaq oynaw.
Bes-altı kúnnen beri, ılaq shabısqan bolıstıń, Gil jermenleri yaranlar (Berdaq).
Ílaq shabıwǵa barǵanda on eshki alǵanın lap etip maqtap ańnan qaytqan kúnleri bolsa, men búgin úsh kiyikti atqa bastırıp usladım — dep awzın kópirtetuǵın edi («Ámiwdárya» j.).