ÓSHIW
Qaraqalpaqsha
f. 1. Sóniw, janıwı toqtalıw.
Állen waqıtta shıra da óshti (J.Aymurazev).
2. Joǵalıw, joyılıw, solıw.
Tozıwı jetkenlikten sırı óship qarawıtıp ketken (U.Pirjanov).
Taxtaydıń xatı óship qalıp taxtay ele neshe mártebe jańalandı (Q.Ayımbetov).
3. Joq bolıw, pitiw, joǵalıw.
Tutqınlardıń ata-anaları, aǵa-inileri, qarındasları, olardıń qarası óshken soń keynine qaytıwǵa májbúr boldı (Q.Irmanov).
Men hayran boldım, Kópten berli urlıqtıń atı óship edi aqırı (A.Bekimbetov).
4. Awıs. Tamam bolıw, óliw.
Keldi doslar xosh aytısıw saatım, Janǵan shıraq edim óshtim men búgin (I.YUsupov).
5. Awızeki s. Spirtli ishimlikti kóp ishiw nátiyjesinde aqıl-xuwshın joǵaltıw, esinen ayırılıw.
0 Úni óshiw — sesti shıqpaw, úndemey qalıw, sesti gúm bolıw.
«Iyt úrer kárwan kósher, úre-úre uni ósher» degen (Q.Irmanov).
Qarap bolǵan eken kúnim, Sóyley almay óshti unim, Jarlıǵa bolmay bir tınım, Bir tamaq dep jortqan eken (Berdaq).
Qaralay óshiw — dińkesi kurıw, sharshaw.
Dúnya-mal jigittiń aqılın alǵan, Ol qaralay óship, ózegi talǵan (I.YUsupov).