ИЛИНИЎ
Қарақалпақша
ф. Усланыў, түсиў, тутылыў.
Аға, аўға илингенин илингендей алып келип өзине тапсырып турдым, — деди күйинип сөйлеген Шерип (Қ.Ирманов).
Айсыз қараңғы түнде далаға шығып баратырғанда қолына бир бел илинди (Қ.Айымбетов).
Билесең бе, өрмекши суп-сулыў аў тоқып, оған бир шыбын-ширкей илинип қалыўын бир шетте турып гүзетеди (М.Нызанов).
0 Аўызға илиниў — танылыў, белгили болыў, даңқы шығыў.
Ақжигит-аў, қаршадай шағыңнан көзге түсип, аўызға илине бермесең-о, баўырым (К.Султанов).
Санға илинбеў — абырайлы болмаў, есапқа алынбаў, итибарға алынбаў.
Масқарапаз ҳеш ўақытта илинбес санға, Ол ардана болсын Абдираманға (И.Юсупов).
Көз илиниў — уйқылаў, азы-кем мүлгиў.
Таң, саз берип киятырғанда ғана зорға көзи илинди (Қ.Ирманов).
Әлленемирде көзим илинип, силем қатып қалыпты (М.Нызанов).
Бир қылға илиниў, бир сабаққа илиниў — жүдә болдырыў, азып-тозыў, жасының ушына жетиў, қартайыў, өлим төсегинде жатыў.
Түслери жүдеў, бәри де ҳарып болдырып, тек көкирегиндеги бир қылға илинип турғандай иленәзик жанлар! (К.Султанов).
Ғарры бир сабаққа илинип жатар еди (М.Нызанов).