ILINIW
Qaraqalpaqsha
f. Uslanıw, túsiw, tutılıw.
Aǵa, awǵa ilingenin ilingendey alıp kelip ózine tapsırıp turdım, — dedi kúyinip sóylegen SHerip (Q.Irmanov).
Aysız qarańǵı túnde dalaǵa shıǵıp baratırǵanda qolına bir bel ilindi (Q.Ayımbetov).
Bileseń be, órmekshi sup-sulıw aw toqıp, oǵan bir shıbın-shirkey ilinip qalıwın bir shette turıp gúzetedi (M.Nızanov).
0 Awızǵa iliniw — tanılıw, belgili bolıw, dańqı shıǵıw.
Aqjigit-aw, qarshaday shaǵıńnan kózge túsip, awızǵa iline bermeseń-o, bawırım (K.Sultanov).
Sanǵa ilinbew — abıraylı bolmaw, esapqa alınbaw, itibarǵa alınbaw.
Masqarapaz hesh waqıtta ilinbes sanǵa, Ol ardana bolsın Abdiramanǵa (I.YUsupov).
Kóz iliniw — uyqılaw, azı-kem múlgiw.
Tań, saz berip kiyatırǵanda ǵana zorǵa kózi ilindi (Q.Irmanov).
Állenemirde kózim ilinip, silem qatıp qalıptı (M.Nızanov).
Bir qılǵa iliniw, bir sabaqqa iliniw — júdá boldırıw, azıp-tozıw, jasınıń ushına jetiw, qartayıw, ólim tóseginde jatıw.
Túsleri júdew, bári de harıp boldırıp, tek kókiregindegi bir qılǵa ilinip turǵanday ilenázik janlar! (K.Sultanov).
Ǵarrı bir sabaqqa ilinip jatar edi (M.Nızanov).