BATPAN
Qaraqalpaqsha
at. gón.s. 1. Eski awırlıq ólshem birligi bolıp, jigirma, jigirma eki, jigirma tórt kilogrammnan qırq kilogrammǵa shekem boladı.
Seksen batpan shúy temir, Toqsan batpan som temir, Altmısh batpan gerdandı, Ol basına dastanǵan («Qoblan»).
Seniń eshegińe sonsha waqıttan beri qansha batpan jem berdim (Q.Ayımbetov).
— Men sizge bir batpan sók bereyin, sonı al da tez jolǵa tús, — deydi qız (qq.x.e.).
2. awıs. Júk, salmaq, awırmanlıq, kóp, zor, úlken.
— Batpan uwayımnan mısqal payda tapqan jeriń boldı ma? (T.Qayıpbergenov).
Óz tasına batpan kelip Jaman tonnan jiyrengen bar (S.Májitov).
Ot basında hámme batır, hámme er, Óz tasına batpan, óz kónline sher (Q.Irmanov).
Júgim awır edi qırq batpan tastan, Sol búgin iynimnen túsip turıptı (A.Dabılov).
0 Batpan tas — awırlıqtı, salmaqtı bildirip keledi, geyde zil qaratas dep te aytıladı.
Ayaqlarım batpantas baylap qoyǵanday ornınan zorǵa qozǵaladı (T.Qayıpbergenov).
Batpan iriń — kózde irin bolıw, irin basıw, irindesiw.
Geybirewleri kózinde batpan iriń, murınların qorq-korq etkizip tartıp, dawısın bólip-bólip shıǵarıp ıńqıldaydı (Á.SHamuratov).
Júdá deseń, barıp kóriń, Hár kózinde batpan iriń (Átesh).
Batpan samal — ózin basqalardan joqarı sanap gárdiyiw, menmensiniw, tákabbirleniw, úlkensiniw.
Súriwli qoyıń joq, japada malıń, Sonda da murnında batpan samalıń (Ájiniyaz).
Jigitlik háseri urǵan murınnıń, Keminde bir batpan samalı bolar (I.YUsupov).