BÓLIM
Qaraqalpaqsha
at. 1. Bir nárseniń jeke bólegi, bir shaqabı.
Bir bólimi Tórtkúl tusınan, bir bólimi — SHımbay tusınan, barlıǵı bir túnniń ishinde arjaqqa ótiwge qawlı qıldı (K.Irmanov).
2. Tarawı, shaqabı.
Nókistegi awıl xojalıq texnikumınıń baǵmanlıq bólimin pitkergen (J.Aymurzaev).
3. Taraw, bap.
Lirikalıq qosıqları degen bólimde wlıwmalıq bar (Á.Tájimuratov).
4. Mákemelerdiń, iri óndirislerdiń ishinde bolatuǵın hár bir tarawı, shaqabı.
Genjaliev sońǵı gezde tayarlaw bólimine xızmetke ornalastı (Q.Ayımbetov).
Onı uslaǵan qalalıq militsiya bóliminiń balalar inspektorı edi (A.Bekimbetov).
5. mat.
Aralas bólsheklerdiń bóletuǵın sanı.
...bunı aralas bólshektiń bólimine bóliw kerek, — dedi muǵallim (gazetadan).
Ol dárhal bólshekke ortaq bolmaytuǵın, onnan keyin birinshi hám ekinshi bólshektiń bólimine bólip, alımın ústine jazıw kerek ekenin ayttı hám sonday bir qansha esaplar shıǵardı (Ó.Ayjanov).