DIZIW
Qaraqalpaqsha
f. 1. Jip, sım hám sol sıyakdı nárselerge ótkerip yamasa ortasınan tesip biriniń izinen birin qatara ótkeriw.
Qoy moynına shınjırdı dizip... (S.Qurbanov).
Teńiz ultanında marjan taslardan, Monshaq dizip uslataman qolıńa (Muńlı shayır).
2. Belgili bir zattı, nárseni qatarlastıra ornalastırıw, qatarma-qatar sapqa diziw, qatarlastırıw.
Bosaǵan qatıq shiyshelerin stol ústine dizip qoydı.
Jekendi esip, arqan etip, qamıstı puqtalap qırshıp, jıńǵıl qora qıspaqlaǵanday qamıslardı birim-birim dizip otır (K.Sultanov).
3. awıs. Biriniń keyninen basqasın, izbe-izlikte, úzliksiz keltiriw, tallaw.
Sóz marjanların diziw.
Marjanday sóz dizip xáripten, SHayırıń ózińdi táriyipler (A.Turdımuratova).
Schyottı ústi-ústine qaǵıp, tsifrlardı qaǵazdıń betine ıqshamdap monshaqtay dizdi (K.Sultanov).
0 Jipke diziw — Sınaw, min tabıw, sıltaw tabıw, sanasa beriw.
...Jipke dizip mayda ókpe-giyneni, Alawızlıq etti-aw nápsi biyleri... (X.Dáuletnazarov).