ZAR II
Qaraqalpaqsha
at. Qayǵı, áserit, wayım, qapalıq, sher, muń.
...Óte almay bógetsiz teńiz-dáryadan, Ómirinshe kúni ótti zar menen (Berdaq).
Estisen ashıǵıńnıń zarın, Qıyaldıń yoshı kelip ket (Ájiniyaz).
0 Zar shekti — qayǵı-áseritke ushıradı, qıynaldı.
Maǵan dúnie górden de tar, SHıqtım dúniege shektim zar (Átesh).
Zar boldı — mutaj boldı, zárur boldı.
Ekinshisi tınbay izdep, Zar bolıp júr qara nanǵa (I.YUsupov).
Zar etti — tiledi, ótindi, jalındı.
Íńıranǵan qobızdıń ırǵaǵı, Qulaqqa zar ettirer ele de («Ámir gúli» t.).
Zar eńiredi — zar jıladı, qayǵılandı, qapalandı, zarlaydı.
Anań, ǵarıp zar eńireydi egilip, Kózlerinen qandı jası tógilip (T.Jumamuratov).
Zar uru — zar qaqsaw, zarlanu.
Eki qolı artına shandıp baylanǵan nashar, kózinen aqqan jastı sıpırıp tastawǵa da dimarı joq, zar urıp tawlanıp jılap otır (K.Sultanov).
Zar qaqsaw — a) qattı awıru, solqıldaw, sızlaw, qaqsaw.
Zigirigim zar qaqsap janım shıǵıp baratırǵanday (J.Aymurzaev).
b) ótinu, jalınu, jalbarınu.
Máspatsha astındaǵı Májnún atına qarap zar qaqsap jıladı («Máspatsha»).
v) zinharlaw, qattı túrde tapsıru.
Zar qaqtı — zarladı, bozladı, jıladı.
— Anajan, ana janıńa baramın, — dep zar qaǵıp jıladı ol (S.Ayni).
Sol zamanda Báwen dúzde mal baǵıp, kún keshirip kúni-túni zar qaqtı (T.Qabulov).
... sabannıń ústinde jatqan ala kópek ırǵıp turıp súyir tumsıǵın kótere zar qaǵıp ulıp qoya berdi (K.Smaǵulov).