KÓLEŃKE
Qaraqalpaqsha
at. 1. Bir nárseniń sayası.
Bir bala dalada kóleńkesin tabanlap kórip, úsh taban záńgilik bolıptı, tarqasayıq, — dedi (Q.Ayımbetov).
2. Kún kózinen panalap otıratuǵın sayaman.
Baǵdıń qalıń kóleńkesine tóselgen gilemniń ústinde otırıp chay ishti (J.Aymurzaev).
3. Birewdin qarawında, panasında kórinbey kalıw.
Sarayda bolǵan ushırasıwlarda Gladıshev bárxama Mamannıń kóleńkesinde qalatuǵın edi, kelesi kúni Maman onıń iyninde kapitanlıq belgi kórip qolların qattı qısıp qoydı (T.Qayıpbergenov).
awıs. 0 Kóleńkesinen qorqıw — bolar-bolmas nárselerden qorkıw, qáweterleniw, biysharalıq hal.
Ózi kóleńkesinen qorqıp, shıpta, boyra satıp kún kórgen miynetkesh diykanlardı kurtıwǵa háreket etti (Q.Irmanov).
Kóleńkede qalıw — sezilmey, sır ashılmay, sóz etilmey, bastırılıp kalıw.
Negizgi másele kóleńkede qalıp qoyadı (G.Esemuratov).
Kóleńke awıspaw — panalaytuǵın orın bolmaw.
Kúnsha ıssı bolsa da, dorba asınǵan jalańayaqlarǵa kóleńke awıspaydı (T.Qayıpbergenov).