ORNAW
Qaraqalpaqsha
f. 1. Dúziliw, jasalıw.
Ǵayratlı edim, Húkimet ornamastan burın jarlıshılıq zardabın kóp tarttım.
Xázir xúkimet ornaǵalı ol kúnler umıt boldı, burınǵıday zorlıq-zombılıqqa jol joq ǵoy... (K.Sultanov).
«Qayta kurıw» úsh-tórt jıl dawam etti, biziń respublikada «SHash al dese bas alatuǵın» tártip ornadı (M.Nızanov).
2. Ornalasıw, jaylasıw.
Al, sonda da maǵan sol wak, Bir tilsimdey qalǵan ornap (K.Raxmanov).
0 Jáhánge ornaw — hámme jerde qurılıw, dúziliw.
Dúnyada joq bolsın ómirdiń jawı, Bul baxıt jáhánge ornasın, doslar (J.Aymurzaev).
Xalıq sanasına ornaw — sanalı bolıw, suwǵarılıw.
Ullı jolda ullı gúres.
Ornasın xalıq sanasına (I.YUsupov).
Júregine ornatıw — júregine sinisiw, siniw.
Bir túrli quwanısh júregime ornap qalǵanday men de jıllı shıray menen Allambergenge qaradım (J.Aymurzaev).
Elinde qaldırıp múbárek ismin, Xalqınıń kewlinde ornadı ketti (T.Mátmuratov).
Ádillik ornaw — durıslıq bolıw, haqıyqatlıq ornaw.
Demek, biziń zamanımız erkinlik zamanı, jábir zulımlıq kóterilgen ádillik ornaǵan zamanı, sonıń ushın bizler baxıtlı (S.Májitov).
Tógetuǵın kóktegi kúndey, Ádalatlıq ornaptı sonday.
(M.Seytniyazov).
Teńlik ornaw — ádillik, haqıyqatlıq ornaw.
Xan, patshanıń barlıǵın jıǵıp, Ornatıptı dúnyaǵa teńlik (M.Seytniyazov).