PERDE I
Qaraqalpaqsha
at. 1. Esik, ayna, saxnaǵa kerip tutılıp qoyılatuǵın gezleme, shımıldıq, zat.
Aynanıń perdesinen Káramatdiin moynın sozıp qaradı (J.Aymurzaev).
Men otırmastan asxananıń qalıń perdesin túsirdim (M.Nızanov).
2. Teatr.
Balettiń, operanıń, dramanıń bólimi, akt.
Perdeniń qosılǵan jerinen sáteń kiyingen birew zońq etip shıqtı da, bizlerge «Teńin tapqan qız» degen pesanı kórsetetuǵının aytıp, rollerde oynaytuǵınlardıń dizimin oqıdı (M.Nızanov).
3. awıs. Bir nársenin juqa qabırshaǵı, qabatı.
Ádilbektiń eki qulaǵı esitpeydi, bombadan qulaǵınıń perdeleri jırtılıp ketken (M.Nızanov).
Túnnin qoyıw perdesin kak ayırıp, aylananıń sırın biletuǵın shırashı jol baslap kiyatır (T.Qayıpbergenov).
Bet perdesin ashıw — sırın alıw, áshkaralaw.