SABAQ I
Qaraqalpaqsha
at. (a.
— tartısıw, jarıs).
1. Sabaq, shınıǵıw, bilim, pán, bir pándi oqıtıwǵa arnalǵan oqıw waqıtı.
Bir kúni túngi waqıt Reyipnazar sabaǵın tayarlap boldı da kátke shıǵıp jatıp qaldı (Ó.Xojaniyazov).
Áwele eń qıyın raq sabaq arifmetikadan másele shıǵardı (Ó.Ayjanov).
Taza sabaq ótip, sonı birazǵa deyin túsindirdi (T.Qayıpbergenov).
Bizde «aktyordiń tapqırlıǵı» degen sabaq bolatuǵın edi (M.Nızanov).
2. awıs. Úlgi, ibrat bolatuǵın, turmıs tájiriybesin asıratuǵın is, háreket, waqıya, qubılıs.
Bul nárse sońǵılıqta ózińizge ulken sabaq boladı (A.Bekimbetov).
— Aydos balam, keshirim sora, atanıń qáteligi ulǵa sabaq boladı (T.Qayıpbergenov).
1. Kiyim xám basqa da nárselerdi tigiw ushın arnalıp ielengen jińishke jip.
Kendirden jińishke sabaq esip, malaqayımnıń qulaǵın tigip aldım (J.Aymurzaev).
Onıń ústine qolına iyne alıp, sabaqtı jip ótkerip kórmegen, bir baw kamıs qırıqpaǵan, bir tal otın shappaǵan, janı pardozda ósken qız (K.Sultanov).
Ol kızıl, kók, sarı sabaqlar menen kestelengen oramalın jıynastırıp, shay kaynatıwdıń tátárrigine kiristi (Ó.Xojaniyazov).
2. Jińishke paqal, pálek.
Geyde bult astınan tuwlap shıqqan ay, sabaǵınan úzilgen sarı jambılshaday jarq etedi (K.Sultanov).
Ieler kók talshıqlı tiri sabaqtan, Móldir suw betine órmegin shalıp (I.YUsupov).
Qolında endi ǵana sabaǵınan úzilgen aq xám kızıl reńli, xosh iyis tarqatıp turǵan roza gúllerinen jasalǵan gúldáste, al iyninde Versache modalar úyinde meniń buyırtpam menen tigilgen qımbat baqalı smoking (K.Kárimov).
0 Sabaqqa iliniw – ómir-kúniniń tawsılıwı, ájeliniń jetiwi.
Ǵarrı bir sabaqqa ilinip jatar edi (M.Nızanov).