SEKIRIW
Qaraqalpaqsha
f. 1. Pútkil deneni ırǵıtıp, keskin háreket etiw, tómenge, joqarıǵa yamasa bir neshe adım arıǵa ózin atıw, ǵarǵıw, ırǵıw.
Sekirip tústim baqshaǵa, Kóz tarttı jemis tolqını (I.YUsupov).
Barjı jaǵada turǵan soń soldat jigitler sekirip dalaǵa shıqtı da, kimi awqat jep, kimi papiros shegip otırdı (K.Sultanov).
— Bul da áldi! — dep bir atlı sekirip túsip, onıń qoynındaǵı jarlıqtı ala sala atına sekirip mindi (T.Qayıpbergenov).
2. SHorshıw, úrkiw.
Tań aldında, «Murat shayıq ózin qudıqqa taslap ólipti» degen xabardı esitip, ekewi birden, tóseginen jılan shıqqanday sekirdi (T.Qayıpbergenov).
Qay jerde qoylar qattıraq aspanǵa sekirip atsa sol jerge jetip baraman (M.Nızanov).
0 Sezikli sekirer — islegen jaman qılıǵı ushın qáweterleniw, ózin ayıplı dep sanaw, esaplaw, shorshınıw.
Sezikli sekirer, shekpenli otırar (kq.x.n.).