SUǴÍW
Qaraqalpaqsha
f. 1. Tıǵıw, túyrew, salıw, kirgiziw, iyteriw.
Sur qanjardı qayrap kektiń tawına, Salsam degen edim xalıq jawına, Aytqanımday sol sózimnen bir shıqtım, Oń jambastan bir suqtım, Maqsım kelip ilikkende awıma (I.YUsupov).
Al, qasaqana Ziyada shıqqan gezde, ya Ómirbay, ya bir joldası utyuglengen qara shalbarınıń qos qaltasına qolların suǵıp, sháltiyip turadı (T.Qayıpbergenov).
Ol maǵan ızǵarlı túrde: ana, kelgindi nasharıń izlep atır, dep júregime nishter suǵıp alatuǵınday (M.Nızanov).
2. Keliw, kiriw.
— Bul ne dawrıq? — dedi esikten basın suǵıp Máteke ǵarrı (K.Sultanov).
Bazda ol sabaq oqıtıp atırǵanda birew esikten bas suǵıp namazǵa aytıp namaz xabarın aytsa, sol óli ushın mollamızdıń shınnan qıynalǵanın da, quwanǵanın da bilmeymiz (T.Qayıpbergenov).