ǴÁRIP
Qaraqalpaqsha
at. 1. Biyshara, juwas, músápir.
Ashlıq jılı ólgen ǵárip anasın, YA oylayma jańa awıl, qalasın? (I.YUsupov).
Láshkerdiń aldında kiyatırǵan Er Ziywar, Kórdi ǵárip anasın («Er Ziywar»).
2. Kámbaǵal, jarlı, ash-jalańash, qorǵansız.
Ǵáriplerdiń múlkin alıp jılatıp, Kóz aldında iytlerine talatıp (Berdaq).
3. Baxıtsız, sorlı.
SHınargúl der boldım ǵárip, Ayaǵımda sansız jarıq (A.Dabılov).
4. Jolawshı, gezende, músápir, kelgindi adam.
Elińe kelgen ǵárippen (AEN).
0 Ǵárip-ǵáser — kámbaǵal, ash, jarlı adamlar, kisiler.
Ǵárip penen ǵáserge tiyer me eken paydası (qq.x.q.).